8樓的生活...

利東街，一條闊不足10米嘅街道，位於香港灣仔莊士敦道同皇后大道東之間，街道兩邊都系“唐樓”，整齊劃一，而且天台相通。嗰處曾經系香港印刷品製作及門市集中地，尤其以印刷喜帖聞名，因而得名“喜帖街”，吸引到唔少鬼佬慕名而來購買富中國特色嘅印刷品留為紀念，系全港唯一重保存住上世紀五六十年代街景嘅地方。





可惜，2006年10月底，香港市建局一統成條街嘅所有業權，實行“舊區重建”———將原區拆卸重建成4座20-40層高嘅住宅同100米長嘅“姻園婚嫁購物步行街”。利東街嘅坊衆用咗十幾年時間向政府爭取保留“喜帖街”，但最終都系難逃清拆嘅命運———2008年1月，利東街嘅重建工程正式展開……時隔一年，由郭偉亮作曲、黃偉文填詞、謝安琪演繹嘅《囍帖街》橫掃2008年度香港四個大型頒獎典禮嘅十項大獎，包括四台聯頒音樂大獎同傳媒大獎。《囍帖街》不但系一首情歌，而且重系一份深具社會意義嘅研究，深切噉反映出草根階層嘅訴求。呢首歌除咗編排悅耳動聽、氣勢恢宏之外，黃偉文填嘅詞亦都相當到肉.佢將利東街遭拆卸嘅現實、時下愛情婚姻價值觀同人生高低起跌嘅哲理，巧妙噉結合埋一齊，借謝安琪極具個性嘅聲線，向世人傳遞信息，同時亦為聽衆提供咗一個思考嘅空間———究竟我哋應該點樣面對社會嘅發展同歷史文化嘅保育呢?

“階磚不會拒絕磨蝕，窗花不可幽禁落霞……”令我諗起黃偉文12年前為許美靜填嘅《傾城》：“瓊樓玉宇倒了陣營，來營造這絕世的風景!”嗰種淒美嘅灑脫同蝕骨嘅幽怨系何等嘅透徹啊!


只可惜當年嘅《傾城》被另外一首大熱《明知故犯》蓋過，攞唔到乜嘢大獎。

但今日呢首《囍帖街》就為黃偉文攞足面子，成為一首“傾城”嘅經典作品———全城都為之傾倒嘞。